S'esbahit-on de ma gentille humeur, Humeur qui est maintenant à la danse, Danse où l'on void la gaye esjouyssance, Esjouyssance ou se baigne mon cœur ? Cœur admiré de ma dame aime-honneur, Honneur que j'ay par ma brave defence, Defence esclair de la belle vaillance, Vaillance object, que Mars receut faveur : Faveur de Cypre, aggreable déesse, Déesse amour, support de ma jeunesse, Jeunesse aimée en despit des jaloux. Jaloux maudicts, ayez donques la rage, La rage habite en vostre sot mesnage, Mesnage tel que brebis entre loups.