Donne moy tes presens en ces jours que la Brume Fait les plus courts de l’an, ou de ton rameau teint Dans le ruisseau d’Oubly dessus mon front espreint, Endor mes pauvres yeux, mes gouttes et mon rhume. Misericorde ô Dieu, ô Dieu ne me consume A faulte de dormir, plustost sois-je contreint De me voir par la peste ou par la fievre esteint, Qui mon sang deseché dans mes veines allume. Heureux, cent fois heureux animaux qui dormez Demy an en voz trous, soubs la terre enfermez, Sans manger du pavot qui tous les sens assomme : J’en ay mangé, j’ay beu de son just oublieux En salade cuit, cru, et toutesfois le somme Ne vient par sa froideur s’asseoir dessus mes yeux.